• Home
  • Robert Burns
    • His Life and Work
    • The Kilmarnock Edition
    • The Edinburgh Edition
    • The Geddes Burns
    • The Merry Muses of Caledonia
    • Popular Songs and Poems at "Let it Blaw"
    • The Face of Robert Burns
    • Study Information and Resources
    • His Legacy
  • About the Club
    • Office Bearers & Honorary Appointments
      • Office Bearers & Honorary Members
      • Past Presidents
      • Past Secretaries
      • Past Treasurers
    • Absent Friends - Gone but not Forgotten
    • Founder Members and the Early Years
    • School Competitions
    • Henderson's Inn / "Brows"
    • Club Constitution
    • Contact
  • Supper Records
    • Supper Toast Lists & Programmes
    • Tam o' Shanter
    • Is there for Honest Poverty
    • The Balerno Song
    • Bards
    • Pipers and their Music
    • The Jolly Beggars of 'Let it Blaw'
    • Croupiers
    • Jim Tait's Toast to "The Immortal Memory of Robert Burns" 1981 & 2003
    • Toast to 'Let it Blaw' 2018
    • Supper Photographs
    • Supper Recordings
      • 2011 Supper Recording
      • 2012 Supper Recordings
      • 2013 Supper Recordings
    • The Star o' Robbie Burns
    • Locations of our Annual Suppers
  • Facts, Figures & Trivia
    • Alphabetical List of Club Members and Cronies mentioned on this Website
    • Who were the 23 Gentlemen at our First Supper in 1881
    • Longest Serving Club Members & Office Bearers
    • Proposers of the Toast "The Immortal Memory of Robert Burns"
    • Proposers of the Toast "Let it Blaw; the Balerno Burns Club"
    • Proposers of the Toast "The Lasses"
    • Club Trivia
    • Burns Trivia
    • Club Excursions
  • Links
    • Burns Clubs
    • Pubs and Inns
    • Other Burns Organisations
    • International Links & Websites

Scotch Drink

 

Gie him strong drink until he wink,
That's sinking in despair;
An' liquor guid to fire his bluid,
That's prest wi' grief and care:
There let him bouse, an' deep carouse,
Wi' bumpers flowing o'er,
Till he forgets his loves or debts,
An' minds his griefs no more.
Solomon's Proverbs, xxxi. 6, 7.

Let other poets raise a fracas
"Bout vines, an' wines, an' drucken Bacchus,
An' crabbit names an'stories wrack us,
An' grate our lug:
I sing the juice Scotch bear can mak us,
In glass or jug.

O thou, my muse! guid auld Scotch drink!
Whether thro' wimplin worms thou jink,
Or, richly brown, ream owre the brink,
In glorious faem,
Inspire me, till I lisp an' wink,
To sing thy name!

Let husky wheat the haughs adorn,
An' aits set up their awnie horn,
An' pease and beans, at e'en or morn,
Perfume the plain:
Leeze me on thee, John Barleycorn,
Thou king o' grain!

On thee aft Scotland chows her cood,
In souple scones, the wale o'food!
Or tumblin in the boiling flood
Wi' kail an' beef;
But when thou pours thy strong heart's blood,
There thou shines chief.

Food fills the wame, an' keeps us leevin;
Tho' life's a gift no worth receivin,
When heavy-dragg'd wi' pine an' grievin;
But, oil'd by thee,
The wheels o' life gae down-hill, scrievin,
Wi' rattlin glee.

Thou clears the head o'doited Lear;
Thou cheers ahe heart o' drooping Care;
Thou strings the nerves o' Labour sair,
At's weary toil;
Though even brightens dark Despair
Wi' gloomy smile.

Aft, clad in massy siller weed,
Wi' gentles thou erects thy head;
Yet, humbly kind in time o' need,
The poor man's wine;
His weep drap parritch, or his bread,
Thou kitchens fine.

Thou art the life o' public haunts;
But thee, what were our fairs and rants?
Ev'n godly meetings o' the saunts,
By thee inspired,
When gaping they besiege the tents,
Are doubly fir'd.

That merry night we get the corn in,
O sweetly, then, thou reams the horn in!
Or reekin on a New-year mornin
In cog or bicker,
An' just a wee drap sp'ritual burn in,
An' gusty sucker!

When Vulcan gies his bellows breath,
An' ploughmen gather wi' their graith,
O rare! to see thee fizz an freath
I' th' luggit caup!
Then Burnewin comes on like death
At every chap.

Nae mercy then, for airn or steel;
The brawnie, banie, ploughman chiel,
Brings hard owrehip, wi' sturdy wheel,
The strong forehammer,
Till block an' studdie ring an reel,
Wi' dinsome clamour.

When skirling weanies see the light,
Though maks the gossips clatter bright,
How fumblin' cuiffs their dearies slight;
Wae worth the name!
Nae howdie gets a social night,
Or plack frae them.

When neibors anger at a plea,
An' just as wud as wud can be,
How easy can the barley brie
Cement the quarrel!
It's aye the cheapest lawyer's fee,
To taste the barrel.

Alake! that e'er my muse has reason,
To wyte her countrymen wi' treason!
But mony daily weet their weason
Wi' liquors nice,
An' hardly, in a winter season,
E'er Spier her price.

Wae worth that brandy, burnin trash!
Fell source o' mony a pain an' brash!
Twins mony a poor, doylt, drucken hash,
O' half his days;
An' sends, beside, auld Scotland's cash
To her warst faes.

Ye Scots, wha wish auld Scotland well!
Ye chief, to you my tale I tell,
Poor, plackless devils like mysel'!
It sets you ill,
Wi' bitter, dearthfu' wines to mell,
Or foreign gill.

May gravels round his blather wrench,
An' gouts torment him, inch by inch,
What twists his gruntle wi' a glunch
O' sour disdain,
Out owre a glass o' whisky-punch
Wi' honest men!

O Whisky! soul o' plays and pranks!
Accept a bardie's gratfu' thanks!
When wanting thee, what tuneless cranks
Are my poor verses!
Thou comes-they rattle in their ranks,
At ither's a-s!

Thee, Ferintosh! O sadly lost!
Scotland lament frae coast to coast!
Now colic grips, an' barkin hoast
May kill us a';
For loyal Forbes' charter'd boast
Is ta'en awa?

Thae curst horse-leeches o' the' Excise,
Wha mak the whisky stells their prize!
Haud up thy han', Deil! ance, twice, thrice!
There, seize the blinkers!
An' bake them up in brunstane pies
For poor damn'd drinkers.

Fortune! if thou'll but gie me still
Hale breeks, a scone, an' whisky gill,
An' rowth o' rhyme to rave at will,
Tak a' the rest,
An' deal't about as thy blind skill
Directs thee best.

Copyright 2015 - The Balerno Burns Club