To the Weavers Gin Ye Go

Share:

 

My heart was ance as blithe and free
As simmer days were lang;
But a bonie, westlin weaver lad
Has gart me change my sang.

Chorus – To the weaver’s gin ye go, fair maids,
To the weaver’s gin ye go;
I rede you right, gang ne’er at night,
To the weaver’s gin ye go.

My mither sent me to the town,
To warp a plaiden wab;
But the weary, weary warpin o’t
Has gart me sigh and sab.
Chorus

A bonie, westlin weaver lad
Sat working at his loom;
He took my heart as wi’ a net,
In every knot and thrum.
Chorus

I sat beside my warpin-wheel,
And aye I ca’d it roun’;
But every shot and evey knock,
My heart it gae a stoun.
Chorus

The moon was sinking in the west,
Wi’ visage pale and wan,
As my bonie, westlin weaver lad
Convoy’d me thro’ the glen.
Chorus

But what was said, or what was done,
Shame fa’ me gin I tell;
But Oh! I fear the kintra soon
Will ken as weel’s myself!
Chorus